فلسفه تش کیش زرتشت دله
اَتّا چی که شایع بَی یه این هَسه که زرتشتیان تَش پَرَستِنه، ولی اِتی نی یه بلکه تَش گَت‌ترین پاک کِنِنده و نورانی‌ترین عنصر هَسّه، تَش ر ِ رمز و سمبل اهورامزدا دونِنّه. فردوسی اینتا مطلب ِ خَو ِر اِتی گِنه:
نگویی که آتش پرستان بدند پرستنده ی پاک یزدان بدند
زرتشت تَش ر ِ بعِنوان شه کیش ِ نشونه انتخاب هاکِرده تا بَوّه:
۱-تَش ِ جور پاک بوئین.
۲-هَم تی که تَش ِ شعله جور شونه، شِمه هم جور بورین، روحانیت، انسانیت و ترقی و تعالی ِ سو بورین.
۳-هَم تی که تَش ِ شعله جِر نِنه، شمه هم تلاش هاکِنین تا گرفتار نفس نَوّین و گَت ِ اَرمون ر ِ مد نظر دارین.
۴-هَم تی که تَش ناپاکون ر ِ پاک کِنّه و شه آلوده نَبونه شِمه هم بدی یه جا نبرد هاکِنین بدون اینکه شه آلوده بَوّین.
۵-تَش هر چی یه جا برخِرد هاکِنه و ر ِ نیز شه جور درخشان کِنّه، پس زرتشتی هم و ِنه پس از برخورداری از دانش و بینش، دیگران ر ِ از فروغ نیکی اَشا(بهترین – پاکی نظام هستی) بهره مند هاکِنه.
۶-تَش زیبا هَسه، حیات دارنه و بیقِراره و تا آخرین لحظه که رووشِن هَسّه شه حرکت ر ِ تِمام نَکِنّه و فعالیت دارنه.انسان هم و ِنه هَم تی فعال بوئه و بی قِرار دَوّه. تَشی هم که آدِم ِ درون ر ِ از آلودگی پاک کِنّه چیزی جز اَشا نی یه و و ِنه با رعایت سه اصل:خار فکر هاکِردن، خار گَپ بَزوئن، خار رفتار هاکِردن(اندیشه نیک، گفتار نیک، کردار نیک) بدست بی یه.
آتشکده ها، ایران ِ باستان ِ د ِله فقط جای عبادت دَ نی بی یه، بلکه و ِشون د ِله دادگاه،درمانگاه و دبستان هم بی یه.آتشکده د ِله موبدان دادرسی کِرد ِنه و بیماران روحی و روانی هم اونجه شفا پیدا کِرد ِنه، کتابخانه جامع هم دَی یه که وَچون ر ِ آموزش هادِن.